भोजपुरिया के कविता भोजपुरिया रस में

बदमासन के नेता

काल्ह अचके अन्धरिया में ,

ऐगो मोर पुरान संघतिया आइल .

रहे उ भितरी से पुरा धाधाइल

आवते उ हमरा के भर पाजा धर लेलस ,

अंकवारी मे भर लेलस ,

हम त पहिले चिन्हनी ना ,

कहनी ! अरे भाई तु के हव ,

आ एतना काहे अगराईल बार ,

का कवनो सोना के कंगन

हाथे लागल बा,

जे एतना धाधाईल बार ?

अलगा हट के लालटेन जरवनी

आ उनका मुँह पर देखवनी

तापाक से उ कहलस हमरा के चिन्हल !

हम तोहर पुरान संघतीया ,

तोहर यार लंगोटीया ,

हम कहनी एतना दिन कहाँ रहले ह ,

कवनो जेल में ?

कहलस ना !

त कहा रहले ह

उ कहलस नइख जानत .

जेल से त 10 साल पहिले भाग गइनी ,

आ जा के झारखंड के ,

कोइलरी में लुका गइनी,

ओजा आपन एगो गेंग बनवानी

ओकनी पर 10 साल शाषन चलवनी

हम पुछनी जे एतना दीन बाद

आज इहाँ कइसे ?

का अब ओजा लुकाए के

गुंजाइस नइखे .

उ कहलस ना रे बुरबक

नाम बदल लेनी ,

काम बदल लेनी ,

आ के तोरा क्षेत्र से

चुनाव लर लेनी .

इमानदार नेता लोग के ,

खुब हरकवनी ,

क्षेत्र भर तेल भर के

मोटरसाइकल चलवनी ,

केहु के बोली से , केहु के गोली से

जे ना मानल उ उठ गइल

उजर चुनरी ओढ डोली से .

रिजल्ट आइल चुनाव के ,

रीकार्ड भोट से जीत गइनी ,

बदमास के सरदार रहनी

इमानदार लोग के मीत भइनी .

सबसे पहिले अपना उपर

लागल इलजाम मेटा देनी ,

जे गवाह ना मानल ओकरा के

हमेशा ला लेटा देनी .

देख यरवा तोर इमनदारी ,

तोरा धइली बा लाचारी ,

घर मे तोरा बेमार महतारी ,

तन पर नइखे निमन एगो सारी .

हमरा के देख –

घुमत बानी हर दम एसी कार में

नया नया कानून रोज

बनाई सरकार में

लरिका हमार पढे ,

संत . माइकल स्कूल में ,

मेहरी मोर घुमेले

ब भेयर चुल में

तोर सब पढल बेकार हो गइल .

लरिका लाचार हो गइल .

तब ले धायं-धायं

दरवाजा पिटाए लागल

जिव घबराय लागल ,

हमार नेता दोस्त

थरथारएल लागल

दरवाजा खोलनी सामने पुलिस रहे ,

जवंन नेता जी के गिरफ्तारी खातीर

पुलिसन के लगवले जुलुस रहे .

नेता जी घेरा गइलें .

एगो पुरान केस में पुलिस के

चंगुल में पेरा गइलन .

तब हम कहनी-

तु सही कहले ह .

हमार पढल बेकार हो गइल .

लेकीन सुन हमार चार लइका –

जवन सबसे बड रहे उ

प्रो0 . हो के बेकार हो गइल ,

ओकरा ले छोट बेटा –

डा0 हो के बेमार हो गइल ,

आ ओकरा ले छोट बेटा -

इंजीनीयर हो के लचार हो गइल .

आ हमार सबसे छोट बेटा

जवान के हम नालायक समझत रही -

उहे आज एह देश के करणधार हो गइल !